Kasadya Streetdancing sa Iligan adunay lima ka kategorya

Sa labing unang higayon sulod sa 25 ka tuig sa Kasadya Streetdancing and Merrymaking Event dinhi sa siyudad, moabot ngadto sa lima ka kategoriya sa tibuok kompetisyon ang masaksihan sa mga katawhan karong Septembre 27, adlaw’ng Dominggo.

Sa nasayran gikan ni Engr. Vic Bueno, Chairman sa maong kalihukan ning tuiga, langkuban ang silver anniversary sa Kasadya sa Open Category, ikaduha ang Congressman Belmonte’s Eskrima, ikatulo ang Higantes Category ug ika-upat ang Parada sa Madang agi’g pag-ila sa opisyal nga prutas sa dakbayan.

Gawas sa maong mga pagpabibo sa maong adlaw panahon sa Diyandi Festival, ipahigayon nianang pagka-gabii ang Tribal Streetparty sa dalang Quezon ning siyudad. (CIO--boy decena)

Septembre 29 ug 30 gideklara nga Diyandi holidays

I-obserbar sa Dakbayan sa Iligan ang duha ka mga local Diyandi holidays ning hinapos nga bahin sa bulan sa Septembre.

Una niini ang Septembre 29 isip non-working public holiday subay sa Batas Pampook Bilang 13 ug gidasonan sa City Ordinance No. 05-4817. Kini aron paghatag og libreng higayon sa mga nagtrabaho lakip na sa mga nagtungha nga maka-selebrar sa adlaw sa kapistahan pahinungod sa mahal nga patron Señor San Miguel Arkanghel.

Subay gihapon sa naasoy’ng ordinansa, nadeklarar nga non-working holiday sa pampublikong sektor ang Septembre 30 nga maglakip sa pampubliko ug pribadong tunghaan. Hinoon, gidasig ang pribadong mga buhatan nga mo-obserbar sa ingon depende sa desisyon sa mga tagdumala. (mta)