Cruz gisiguro ang seguridad sa city fiesta

Gitinguha ni Mayor Lawrence Lluch Cruz nga mamintinar ang nasinati karong kahusay ug kalinaw sa dakbayan ilabi na ning panahon sa pagsa-ulog sa tinuig nga pista.

Kini ang hinungdan nga iyang gipatawag ang usa ka panagtigum niadtong Septembre 23 sa mga sakop sa Iligan City Peace and Order Council didto sa SP Session Hall, diin gituki ang labing ulahing security updates sa atong dapit.

Sa maong tigum, mipahayag si Mayor Cruz sa kamahinungdanon sa seguridad sa dakbayan batok sa bisan unsang matang sa hulga, ilabi na sa pagpang-abot na karon sa mga turista gikan sa gawas ug sulod sa nasud.

Gibutyag sa mga kadagko-an sa pulis ug militar nga padayon nilang gipatuman ang hugot pagbantay sa tanang bahin sa siyudad pinaagi sa pagbutang og personahe sa mga matawong dapit, hini-usang pagpatrolya matag karon ug unya, pagbutang og mga fixed ug mobile check points ug uban pa.

Dugang niini, giawhagan ni Mayor Cruz ang mga pulis ug militar nga isustiner ang kalinaw sa dakbayan bisan human sa pista agi’g dugang pagdasig sa mga imbestor sa mga housing projects, restaurants ug ubang patigayon nga nagpangabot karong mga panahona.

Alayon sa maong pangingkamot, miuyon ang mga sakop sa Iligan City Peace and Order Council (ICPOC) ang sugyot ni City Councilor Providencio “Boy” Abragan, Sr. nga mamahimong kabahin sa mga paglihok sa grupo ang hut-ong sa mga drivers sa dakbayan.

Usa ka resolusyon ang naaprobahan kagahapong adlawa nga naghatag og designasyon sa mga sakop sa Iligan City Transport Alliance (ICTA) ug Coalition of Lanao Utility Transport for Change (CLUTCH) nga mga kaabag sa ICPOC diha sa pagkalap og impormasyon.

Subay niini, gitahasan karon ang duha ka mga asosasyon sa pagsumiter sa buhatan sa Mayor sa pangalan sa ilang mga lehitimong membro.

Gitataw atol sa ICPOC Meeting kagahapong adlawa nga direktang mohimo’g koordinasyon ang maong hut-ong ngadto kang Mayor Lawrence Lluch Cruz isip Chairman sa ICPOC o kaha kang P/Sr. Supt. Bernard Reamon, Jr., hepe sa kapulisan ning dakbayan.

Mibutyag si Konsehal Abragan nga una nang nahatagan og akreditasyon sa Sangguniang Panlungsod ang ICTA isip usa ka non-government organization sa atong dapit.

Dugang pa niini, 35 ka mga retiradong pulis, sundalo boluntaryong moabag sa pagpatunhay sa kalinaw sa siyudad.

Gipresentar ni Mayor Lawrence Lluch Cruz atol sa Iligan City Peace and Order Council Meeting ang katlo-an ug lima (35) ka mga retiradong pulis, sundalo ug kanhi sakop sa Philippine Constabulary (PC) kinsa boluntaryong moabag sa mga paningkamot alang sa kahusay ug kalinaw sa dakbayan.

Gipangulohan ang maong grupo ni Retired P/Sr. Supt. Antonio Garado.

Niini lamang nakalabay’ng Septembre 18, mipakanaug si Mayor Cruz og executive order nga nag-implementar sa pipila ka mga probisyones sa Republic Act 7077 nga nagtugot sa mga local governments sa paglambigit sa serbisyo sa mga retiradong pulis o sundalo diha sa pagmintenar sa kahusay ug kalinaw.

Hinoon, gisumiter una karon ni Mayor Cruz ang maong EO ngadto sa konseho sa siyudad aron ilang maratipikahan. (CIO--MTA/boy decena)