Mga kandidata sa Miss Iligan 2009 muduyug sa Philippine Tourism Week

Gidapit nga mopasundayag atol sa pagbukas sa pagsaulog sa Philippine Tourism Week didto sa SM City, Cagayan de Oro ugmang adlawa ang dose ka mga kandidata sa Miss Iligan 2009.

Gibutyag kini nga kasayuran mismo ni Director Catalino “Butch” Chan III sa rehiyonal nga buhatan sa Department of Tourism kinsa nahimong bisita sa dakbayan sa natigayong pagbukas sa Taboan sa Iligan niadtong miaging gabii.

Sumala ni Chan, “usa ka maayong okasyon ang tourism week kanus-a ma-promote sa mga kandidata sa Miss Iligan ang turismo sa dakbayan ilabi na ang mga kalihukan ning pagsaulog sa Diyandi Festival”.

Mihangyo usab ang DOT 10 Director sa mga opisyal sa siyudad nga tabangan siyang madala ang makoronahan unya nga Miss Iligan 2009 ngadto sa usa ka tourism promotions activity didto sa Malaysia sa Marso 2010. Sa nasayran, si Chan ang natudlo karong Head of Philippine Delegation sa Brunei-Indonesia-Malayasia-Philippines tourism summit. (CIO/mta/boy decena)