"Salamat sa malampusong job fair-- Councilor Anghay

Mainitong gipasalamatan ni City Councilor Ariel Anghay ang kawhaan ug usa (21) ka mga employers ug agencies kinsa misalmot sa natigayon kagahapong adlawa nga Jobs Fair didto sa Rizal Park alayon ning pagsa-ulog sa 2009 Diyandi Festival sa Iligan. Gilangkuban kini sa napulo’g unom alang sa overseas employment ug lima alang sa local employment.

Gipanghinaut sa Chairman sa Committee on Labor and Employment sa Sangguniang Panlungsod nga matubag sa maong jobs fair ang anam-anam nga pagsulbad sa mga insidente sa unemployment ug underemployment sa atong dapit.

Sa panuki-duki ni Konsehal Anghay sa mga datos sa National Statistics Office (NSO), nasayran nga 5.3 por cento sa kinatibuk-ang populasyon sa Rehiyon 10 ang wala’y trabaho samtang 29 por cento usab ang wala maha-um sa kwalipikasyon o kaha wala’y full-time nga trabaho.

Lakip nga gipasalamatan sa konsehal ang Department of Labor and Employment (DOLE), Technical Education and Skills Development Authority (TESDA) ug Public Employment Services Office (PESO) sa pagpasi-ugda sa natigayong jobs fair.

Sa susamang kalambo-an, gipadala ni Mayor Lawrence Lluch Cruz ang Chairman sa Diyandi Festival Steering Committee nga si Suarez Barangay Captain Doods Dalangin isip iyang representante aron mobukas sa jobs fair. (boy decena/CIO)