Jobs Fair ipahigayon atol niining Diyandi Festival

Andam na ang kagamhanang lokal sa natakdang Jobs Fair nga ipahigayon ugmang adlawa diha sa Rizal Park (plaza publiko) ning siyudad, gikan sa alas 8:00 sa buntag hangtud sa alas 5:00 sa hapon.

Kini kabahin pa gihapon sa pagselebrar sa Diyandi Festival sa syudad-- ang paghatag ug mga oportunidad alang sa mga nagkinahanglan og trabaho.

Sa nasayran gikan ni Mr. Celso Fernando, natakdang modangat atol niini ang Regional Director sa Department of Labor and Employment-Regional Office 10 nga si Atty. Allan Macaraya isip pinasidunggang bisita. Mibutyag usab ang Manager sa Public Employment Services Office sa Iligan nga salmutan ang jobs fair sa dili moubos sa biente (20) ka mga local ug overseas employment agencies.

Mopahigayon sa pormal nga pagbukas sa maong kalihukan mao si Mayor Lawrence Lluch Cruz kauban sila si City Councilor Ariel Anghay sa Committee on Labor and Employment sa konseho ug Suarez Barangay Captain Doods Dalangin, Chairman sa 2009 Diyandi Festival.

Parte ang natakdang jobs fair sa gatusan ka mga kalihukan alayon ning pagsaulog sa tinuig nga pangilin sa dakbayan sa Iligan. (CIO/mta)