Dakbayan sa Iligan, gikonsiderar sa PRA nga himoong retirement site

Gikonsiderar karon sa Philippine Retirement Authority (PRA) ang Dakbayan sa Iligan isip usa sa mga retirement site sa mga langyaw.

Gibutyag kini nga kasayuran ni Regional Director Catalino “Butch” Chan III sa Department of Tourism- Regional Office 10 atol sa iyang pagbisita sa dakbayan dili pa lamang dugay. Sigun sa asoy ni Chan, nahimo na karong parte sa DOT ang PRA.

Sa samang hisgutan, nasayran usab gikan ni Mayor Lawrence Lluch Cruz nga aduna na’y mga imbestor sa mga housing projects alang sa foreign retirees ang mibisita ning mga panahona sa iyang buhatan.

Gisaysay sa amahan sa siyudad nga pipila sa mga dapit sa dakbayan nga tinguhang pagatukuran sa maong mga imbestor ang Pugaan, Tipanoy ug Abuno.

Giabi-abi ni Mayor Cruz ang naasoy’ng kalambo-an sanglit timailhan man kini nga dako ang kumpiyansa sa mga daghang mga langyaw nga anhi na permanenteng manimuyo o kaha posibleng mobubo sa ilang puhunan sa panahon sa ilang pag-retiro. (CIO--mta)