Iligan Star Grand Finals Night, karong gabii na!

Ipahigayon na karong alas 6:00 sa gabii, Septembre 25, diha sa Rizal Park ang gipaabot sa tanan nga Grand Finals Night sa Iligan Star-Season 3 ug Little Iligan Star-Season 1 alayon ning pagsa-ulog sa 2009 Diyandi Festival sa Iligan.

Masaksihan karong gabii ang showdown sa mga singing idols nga miporma sa Big 4 sa matag division- Little ug Main, kinsa subling gi-challenge nga mo-perform sa ilang mellow ug fastbeat songs.

Milangkob sa Main Division Big 4 sila si Joie Avila, 15 anyos nga taga-Suarez; Leon Candog, 18 anyos nga taga Sta. Filomena; Cherry Sabinay, 17 anyos nga taga Saray, ug Jun Bucol, 24 anyos nga taga Mahayahay. Samtang sa Little Division Big 4 mao sila si Jazz Latoza, 11 anyos nga taga Santiago; Earth Callo, 11 anyos nga taga Pala-o; Mark Alvarez, 11 anyos nga taga Tibanga, ug Thea Vicoy, 11 anyos nga taga Barangay Tubod.

Ang Big 4 mao ang grupo sa mga survivors human sa duha ka mga elimination nights.

Ang Iligan Star mao ang giila karong labing prestihiyosong singing idol search sa kasaysayan sa dakbayan nga miumol usab og mga finalists alang sa nasudnong kompetisyon. (CIO-mta)